كنت أقرأ رواية جديدة للكاتب الكبير "جيمس باترسون" بعنوان "بوست كارد كيلرز"، و شدني فعلاً المقطع ده من الرواية لما المحقق الأمريكي "جايكوب" كان بيتعشا مع الصحفية السويدية "ديسي" و بدأ يسألها أسئلة شخصية عشان يتعرف عليها أكتر.. فلما سألها هي منين في "االسويد".. جاوبته إنها من "آدالين" في مقاطعة "نورلاند" المشهورة بأحداث الشغب في ثلاثينيات القرن العشرين و إنتهت بمصرع عمال كان بيتظاهروا على يد أفراد من الجيش..
هنا بقة، قال "جايكوب" بحسن نية إنه أكيد فيه سبب مقنع للجيش إنه يعمل كده لإن الجيش مش ممكن يقتل أفراد الشعب من غير سبب.. أول ما قال كده .. هبـِّت فيه "ديسي" و قالته إنه مافيش سبب لقتل متظاهرين عزل و مش شايلين سلاح و كل أملهم إنهم يستردوا أجورهم المسلوبة.. راح "جايكوب" قايها: "أنا ماكنتش أعرف إنك شيوعية".. راحت هي ردت عليه و قالته: "و أنا ماكنتش أعرف إنك فاشي".
أبرز الكاتب "جيمس باترسون" جانب كبير من تفكير الشعب الأمريكي المؤمن بأن الجيش يحمي الشعب و لا يمكن أن يخطيء في حق شعبه بدليل إنه سأل بسلامة نية عن سبب مقنع لقتل المتظاهرين و ما كلفش خاطره إنه يسأل عن سبب المظاهرة أصلاً.. الطريف في الأمر إن المشادة اللي حصلت بين "جايكوب" و "ديسي" شبيهة باللي بيحصل دلوقتي في مصر.. فيا ريت بدل ما نغلط في بعض و نقول إنت شيوعي أو فاشي أو إخواني أو غير إخواني و التقسيمات الفارغة ديه.. نهدأ شوية و نفكر في بكرة.. و الله المستعان !
No comments:
Post a Comment