أولادنا

النهاردة شوفت حاجة خلتني أراجع نفسي عن الأساليب التربوية إللي يتبعها الآباء في مصر اليومين دول. ساعات بحس إن الآباء لازم يخللوا بالهم من ولادهم شوية و يعرفوا هما بيفكروا إزاي بدل ما يكتشفوا الحقيقة المرة بعد فوات الأوان.

و أنا في الصيدلية، جالي واد في ثالثة ثانوي أزهري يطلب دواء والده المعتاد. و الده على فكرة بيصلي بينا في الجامع ساعات لما يكون الإمام مش موجود زائد إنه إبن شيخ معروف جداً في المنطقة هنا.

المهم إن الولد ده كان ماسك في إيده سيجارة، و بيشربها بإستخفاف قدامي. قلته: "إنتا بتشرب سجاير ؟" قالي ببساطة: "أيوه. أنا كبرت خلاص و عندي صنعة و أقدر أشرب سجاير."

صدمني الرد جداً. قلته: "هي ديه في نظرك أسباب مقنعة عشان تشرب سجاير؟". قللي: "آه". قلته: "أعرف أولاد أصغر منك في السن و عندهم صنعة برضه و عمرهم ما شربوا سجاير. غير كده. أنا كبير قدامك أهه، و صاحب صيدلية. بس عمري ما شربت سجاير".

تعرفوا قاللي إيه؟؟ قاللي: "ظروفي كده". صـِعـِب عليا حال أبو الولد أكثر من الولد نفسه. لأن أبوه راجل طيب أوي و الله. الحاصل.. إديتله الدواء و مشي.

نفس الولد جالي بعد حوالي نص ساعة يطلب مني مـُعطر للجو عشان البيت. إديتله واحد. و من عادتي إن أكتب على العبوة سعرها عشان أنا بنسى ساعات. قاللي: "تقدر تمسح السعر لو سمحت يا دكتور؟" "إستغربت الطلب ده و قلته: "ليه إن شاء الله ؟" قاللي ببجاحة شديدة: "أصله مكتوب سعرها 9.75 جنيه و أنا قلتله إن سعرها 15 جنيه". قلت: "مش فاهم ؟" قاللي: "أصلي عايز أكتب عليها 15 جنيه بدل 9.75 عشان أخد الفرق في جيبي و أجيب بيهم سجاير".

إتصدمت جداااااً من الرد. معقولة الواد ده يصل بيه الحال إنه ينصب على أبوه الراجل الفاضل و يتباهي بالجريمة الأخلاقية ديه قدامي ؟. إيه إللي حصل في الدنيا ؟